डॉ. बाबासाहेब आंबेडकर जयंती मोठ्या उत्साहात साजरा होणार!

ठाणे शहर बाजारपेठ ते तलावपाळीपर्यंत निघणार भव्य मिरवणूक; सांस्कृतिक कार्यक्रमांचीही रेलचेल
ठाणे:
भारतीय राज्यघटनेचे शिल्पकार, भारतरत्न डॉ. बाबासाहेब आंबेडकर यांची जयंती यंदा ठाणे शहरात अत्यंत उत्साहात आणि भव्य स्वरूपात साजरी करण्याचा निर्णय घेण्यात आला आहे. ‘डॉ. बाबासाहेब आंबेडकर जयंती महोत्सव समिती’ आणि ‘ठाणे महानगरपालिका’ यांच्या संयुक्त विद्यमाने, तसेच समस्त आंबेडकरी जनतेच्या सहकार्याने रविवार, १७ मे २०२६ रोजी या महोत्सवाचे आयोजन करण्यात आले आहे.
समितीची महत्त्वपूर्ण बैठक संपन्न
१९ एप्रिल रोजी शास्त्रीनगर, पोखरण रोड क्र. १ येथील ‘सम्राट बंगला’ येथे या महोत्सवाच्या नियोजनासाठी महत्त्वाची बैठक पार पडली. या बैठकीच्या अध्यक्षस्थानी माननीय नानासाहेब इंदिसे होते. याप्रसंगी भास्कर वाघमारे, कार्याध्यक्ष बुद्धभूषण गोटे, महासचिव ॲड. डॉ. डी. एस. सावंत यांच्यासह समितीचे सर्व पदाधिकारी, महिला कार्यकर्त्या आणि आंबेडकरी अनुयायी मोठ्या संख्येने उपस्थित होते.

असा असेल जयंती महोत्सवाचा कार्यक्रम:

मिरवणुकीचा प्रारंभ: १७ मे रोजी दुपारी ४:०० वाजता कोर्ट नाका येथील डॉ. बाबासाहेब आंबेडकर यांच्या पुतळ्याला पुष्पहार अर्पण करून मिरवणुकीला सुरुवात होईल.
मार्ग: ही मिरवणूक ठाणे शहर मार्केटमार्गे रेल्वे स्थानकापर्यंत जाईल. तेथील डॉ. बाबासाहेब आंबेडकरांच्या पूर्णाकृती पुतळ्याला अभिवादन करून मिरवणूक पुढे तलावपाळीकडे मार्गस्थ होईल.
अभिवादन: तलावपाळी येथे छत्रपती शिवाजी महाराज आणि पुण्यश्लोक अहिल्यादेवी होळकर यांच्या पुतळ्यांना पुष्पहार अर्पण करून आदरांजली वाहण्यात येईल.
विसर्जन: सायंकाळी ७:०० वाजता गडकरी रंगायतन परिसरात मिरवणुकीचे विसर्जन होईल.
सांस्कृतिक मेळावा: सायंकाळी ७:०० ते रात्री ११:०० वाजेपर्यंत गडकरी रंगायतन येथे विशेष सांस्कृतिक कार्यक्रमांचे आयोजन करण्यात आले आहे.
यंदाची जयंती ऐतिहासिक आणि शिस्तबद्ध पद्धतीने साजरी करण्यासाठी सर्व कार्यकर्त्यांनी कंबर कसली आहे. सर्व आंबेडकरी जनतेने आणि ठाणेकरांनी या सोहळ्यात मोठ्या संख्येने सहभागी व्हावे, असे आवाहन जयंती महोत्सव समितीच्या वतीने करण्यात आले आहे.